საგანგებო რელიგიურ ფორუმზე მისასალმებელი სიტყვა

„15 ივლისის სახელმწიფო გადატრიალების მცდელობისა და რელიგიის ბოროტად გამოყენების წინააღმდეგ ერთიანობა, სოლიდარობა და სამომავლო პერსპექტივები“.

3-4 აგვისტო 2016

ბისმილლაჰირრაჰმანირრაჰიმ.

დიდება ალლაჰს, რომელმაც ისლამის ღირსი გაგვხადა, რომელმაც წმინდა წიგნსა და სუნასთან ერთად ჯანსაღი გონება, ჯანსაღი გული და ჯანსაღი სული გვიბოძა. უსაზღვრო  დიდება მას, რათა მან გონებისა და  თავისუფალი ნების გამოვლინების, ჭეშმარიტებისა და მცდარის ერთმანეთისგან განსხვავების უნარი და შესაძლებლობა მოგვცა.

უსაზღვრო კურთხევა და მშვიდობა ჩვენს ძვირფას შუამავალ მუჰამმედს, რომელმაც ჩვენამდე მოიტანა წმინდა წიგნი, გაგვაცნო მისი სიბრძნე და ამ სიბრძნის მიხედვით ცხოვრების მაგალითი მოგვცა.

ბატონო პრეზიდენტო,

პატივცემულო დეპუტატებო,

პატივცემულო რელიგიური ფორუმის წევრებო,

ძვირფასო მასწავლებლებო,

მას-მედიის წარმომადგენლებო,

ბატონებო და ქალბატონებო,

უპირველეს ყოვლისა, დიდი სიყვარულითა და პატივისცემით მოგესალმებით. უზენაესი ალლაჰისგან მშვიდობა, წყალობა და ბარაქა არ მოგკლებოდეთ.

ბატონო პრეზიდენტო,

პატივცემულო დეპუტატებო,

ამ საგანგებო რელიგიური ფორუმის წევრებისა და დამსწრეთა სახელით, მინდა გულითადი მადლობა გადაგიხადოთ, რათა პატივი დაგვდეთ და მობრძანდით.

ასევე მინდა მადლობა მოვახსენო დამსწრე საზოგადოებას და ვისურვო, რომ აღნიშნული ფორუმი, რომელიც  „15 ივლისის სახელმწიფო გადატრიალების მცდელობისა და რელიგიის ბოროტად გამოყენების წინააღმდეგ ერთიანობა, სოლიდარობა და სამომავლო პერსპექტივები“-ს სახელს ატარებს, დადებით შედეგებს გამოიღებს.

ბატონო პრეზიდენტო,

პატივცემულო  ფორუმის წევრებო,

ამა წლის 15 ივლისის ღამით, მოღალატე დაჯგუფებამ ჩვენი სამშობლოს მომავლის დაბნელება განიზრახა. ამ ამბის  პირველივე წუთებიდანვე მეჩეთების მინარეთებიდან „სელა“ -ს ხმა გაისმა და როგორც დამოუკიდებლობისთვის ბრძოლის დღეებში, ჩვენი ერის ღირსებისა და მომავლის დასაცავად გულანთებული ადამიანები გამოვიდნენ. ღმერთმა გაანათოს იმ ღამეს დაღუპულთა სულები, რომლებმაც შაჰიდობის საფეხურს მიაღწიეს. ჩვენი შაჰიდების ნათელით ჩვენი ქვეყნის მომავალი კიდევ ერთხელ გაბრწყინდა.

ამ ღალატის წინააღმდეგ გამოსული ჩვენი გადარჩენილი ძმები გმირები არიან. ისინი მუსლიმი მრევლის გვირგვინი და ჩვენი სიამაყე არიან. დიდი პატივისცემითა და მოკრძალებით მივესალმები მათ და გამოჯანმრთელებას ვუსურვებ.

მინდა ბედნიერება გამოვხატო, რადგან იმ ერის შვილი ვარ, რომლის მოქალაქეებმა ამ მოღალატე და სისხლიანი გადატრიალების მცდელობის წინააღმდეგ სიმამაცისა და ერთგულების მაგალითი მთელ მსოფლიოს აჩვენეს და სამშობლო, ხალხი, ეროვნული ნება და კონსტიტუციური წესრიგი დაიცვეს. 15 ივლისის ღამით ჩვენი ერის ეს ღირსეული დგომა, ჩვენს მომავალ თაობებს არ დაავიწყდებათ და მუდმივად მადლიერებით გაიხსენებენ. ჩვენმა ხალხმა, როგორც ისტორიულად ხდებოდა ხოლმე, 15 ივლისის ღამესაც რწმენა, სამშობლო, მომავალი და თავისუფლება წინა პლანზე დააყენა. იმ ღამეს ხალხმა უფლება არ მისცა ბოროტ ხელს, რომ ჩვენს წმინდა ღირებულებებს შეხებოდა. იმ ღამეს, ხალხმა დაიცვა საკუთარი მიწა-წყალი, სინდისი, ნამუსი და ღირსება. ხალხმა გამოხატა თავის ნება, ქუჩაში გამოვიდა და თავისი გონება და სული სხვებს არ ჩააბარა.

15 ივლისის ღამეს, იმ სასტიკ მომენტებში, პირველივე წუთებიდანვე ჩვენი ერის სულიერების ფეხზე დგომისათვის მეჩეთებიდან სელასა და ეზნის ხმებმა მოიცვა მთელი ქვეყანა. ამ გზით ერის გაერთიანებისათვის მადლობას ვუხდი მუფთებს, იმამებს, მუეზინებს, მედრესეს მოსწავლეებსა და ყველა მოხალისე ადამიანს, რომელიც ამ პროცესში ჩაება. დიდება ალლაჰს, რადგან გადატრიალება, რომელსაც ეზანი უნდა შეეჩერებინა, ეზნისა და სელას მეშვეობით შეჩერებულ იქნა.

 

ბატონო პრეზიდენტო,

ძვირფასო ფორუმის წევრებო,

ჩვენი სამმართველო, ასე დღის წესრიგიდან გამომდინარე რელიგიურ ფორუმს პირველად აწყობს. ამ ქვეყანაში უკვე 40 წელია რელიგიას ამოფარებული ადამიანები არეულობის მარცვალს თესავენ და ამ სისხლიანი გადატრიალების მცდელობით, არამარტო ჩვენს ქვეყანასა და ხალხს, არამედ მთელ ისლამურ სამყაროს უდიდესი ზიანი მოუტანეს. ამ მოღალატე დაჯგუფებამ მთელი ეროვნული ღირებულებები ფეხქვეშ გათელა და ამასთანავე ჩვენი რწმენა, უსაფრთხოება, ტოლერანტობა, ღირსება, სარწმუნოება და ტრადიცია საფრთხეში ჩააგდო. რაც ყველაზე ცუდია, აღნიშნული დაჯგუფება წლების განმავლობაში საკუთარ გეზს აფიქსირებდა, როგორც „მეცნიერული ისლამი“, პროტესტანტული მუსლიმობა“, რელიგიათა შორის დიალოგი“, „შემწყნარებლობა“, „დამთმობი მუსლიმი“ და ა.შ. არადა 15 ივლისის ღამეს, როცა ჩვენს პარლამენტს, ჩვენს ქალაქებსა და ქუჩებს ბომბავდნენ, როცა ჩვენი სამშობლოსა და ხალხის წინააღმდეგ ტერორი  მოაწყვეს, სულაც არ შერცხვათ, რომ მათი გაცხადებული გეზი შეცვალეს და ერაყისა და სირიის მსგავსად სისხლისღვრა გამართეს. ამ სამარცხვინო და სასტიკი ქმედებით, ეროვნული იარაღისა და ტექნოლოგიის გამოყენებით ქალაქების დაბომბვით მხოლოდ ჩვენი ფიზიკური არსებობა კი არ ჩააგდეს საფრთხის ქვეშ, არამედ მათ დიდი დარტყმა მიაყენეს ჩვენს სულიერ ღირებულებებსა და წმინდა რელიგიურ ფასეულობებს, ერის ერთიანობასა და უსაფრთხოებას.  

 

ბატონო პრეზიდენტო,

ძვირფასო ფორუმის წევრებო,

ჩვენს წმინდა წიგნში დიადი ღმერთი გვაფრთხილებს: „ყურადღებით იყავით! გზასაცდენილებმა ალლაჰით არ მოგატყუონ“. ჩვენ, როგორც ქვეყანამ და ერმა, როგორც მრევლმა,  ეს გაფრთხილება და მასში არსებული სიბრძნე ამ მძიმე გამოცდით გავიაზრეთ.

წლების განმავლობაში ეს ადამიანები ისე გვეჩვენებოდნენ თავს, თითქოს ჭეშმარიტების მაღიარებელი, უდანაშაულო თანამემამულეები იყვნენ. ისინი, ამ საფარველის ქვეშ, თითქოსდა ჭეშმარიტებისთვის, ხალხისა და ქვეყნის საკეთილდღეოდ მშრომელი უმწიკვლო ადამიანები, 15 ივლისის ღამემდე ემზადებოდნენ და ამ ღამეს მოღალატეობრივად და ვერაგულად თავს დასხნენ ჩვენს სახელმწიფოს, ხალხს, ჩვენს ქალაქებსა და ყველაფერს, რაც ცივილიზაციის სახელით შექმნილა. მათ სახე გამოაჩინეს და როგორც ჯაჭვებისგან გათავისუფლებულმა ბოროტებამ, ადამიანების დახოცვა დაიწყეს. ყალბი თავაზიანობა და ტკბილი სიტყვები, ცრემლები და ქადაგებები ხალხის იმედებსა და სურვილებს იარაღად იყენებდა, რათა ეს დაფარული მიზანი განეხორციელებინა.

ამ თავაზიანი ქცევით გამორჩეულმა რობოტების დაჯგუფებამ ხალხი  ღმერთის, შუამავლისა და მისი მიმდევარი მეგობრების სახელით მოატყუა. მათ სათავისოდ გამოიყენეს ღმერთის ბრძანებები და შუამავლის ჰადისები, ისლამის სწავლულთა ცოდნა და მემკვიდრეობა, რათა ამ შავ-ბნელი მიზნისთვის მიეღწიათ.

ისინი ჩვენს თვალწინ რელიგიური საზოგადოების იმიტაციას აკეთებდნენ და როგორც ტროას ცხენი, ჩვენს საზოგადოებაში შემოვიდნენ და რელიგია, რელიგიური გაერთიანებები და ქველმოქმედება ბოროტად გამოიყენეს. მათ მოატყუეს არა მხოლოდ ჩვენი საზოგადოება, არამედ მთელი ისლამური სამყარო, რადგან მთელი მსოფლიოს მუსლიმებს თავს აჩვენებდნენ, თითქოს სიკეთეს ემსახურებოდნენ და ადამიანებს ეხმარებოდნენ, არადა სინამდვილეში ისინი ბნელ ძალებს ემსახურებოდნენ, ხოლო საამისოდ კი უზარმაზარ თანხებს ხარჯავდნენ.

 

ბატონო პრეზიდენტო,

ძვირფასო ფორუმის წევრებო,

ამ ტერორისტული ორგანიზაციის წევრებმა 15 ივლისის ღამით სრული სიგიჟე და ბოროტება ჩაიდინეს, რითიც აჩვენეს, რომ  უგნურების მორწმუნეობამ, გონების სხვაზე გამქირავებლების ღვთისმოსავობამ შეიძლება არამარტო საკუთარი თავს ავნოს, არამედ ჩვენი დიდი ერისთვისაც საფრთხედ იქცეს და თავს უბედურება დაატეხოს.   ამასთანავე მათ აჩვენეს, რომ სარწმუნოების ქოლგის ქვეშ  შეფარება და იქიდან პოლიტიკური მზაკვრობით წინსვლის მცდელობა, საბოლოო ჯამში სარწმუნოებისა და მორალის მზაკვრობის საშუალებებად გამოყენებას გამოიწვევს.

ისლამის ძირითადი პირნციპი, როგორც მოგეხსენებათ, ერთი ღმერთს აღიარებაა და მის გარდა სხვა არავის მიმართ თაყვანისცემას არ ითვალისწინებს. ისლამი შუამავალ მუჰამმედის გარდა სხვა ადამიანს, უდავო და უალტერნატოვო ავტორიტეტებს არ ცნობს.

არავის აქვს უფლება საკუთარი თავი სარწმუნოების ერთგვარ წარმომადგენლად წარმოადგინოს და სხვა ადამიანები დაარწმუნოს, რომ მას დაემორჩილონ და მასზე იყვნენ დამოკიდებულნი. რელიგიური გზამკვლევობა მხოლოდ და მხოლოდ ცოდნის მიღებისა და მორალური პრინციპების გათავისების პროცესში განათლების ერთ-ერთი ნაწილია და სხვა არცერთი მიმართულებით მისი ისლამის არსთან შეუსაბამო გამოყენება არ შეიძლება.

ისლამის სარწმუნოებაში აბსოლუტური დამოკიდებულება ყურანითა და სუნას მიხედვითაა განსაზღვრული. მორალი, ჩვენი სარწმუნოების ძირითადი პრინციპია. შუამავალი ბრძანებდა: „მე მაღალი ზნეობის სრულყოფისათვის ვარ მოვლენილი“. ეს დაჯგუფება კი მიმართავდა ისეთ მეთოდებს, როგორიცაა იატაკქვეშა საქმიანობა, საკუთარი თავის განსხვავებულად წარმოჩენა, ორპირობა, ორმაგი სტანდარტები, მიბაძვის საჭიროებიდან გამომდინარე არამის ჩადენა, კოდური სახელების გამოყენება, გარემოს შესაბამისად, რწმენის შეუსაბამოდ ცხოვრება, ტყუილის ლაპარაკი, სარწმუნოების მიხედვით სხეულის დასაფარი ადგილების დაუფარაობა, შანტაჯი, სხვების მიმართ ძირგამომთხრელი საქმიანობა და სხვა. არადა ამ და მსგავს საქმიანობებს ისლამთან არანაირი კავშირი არ გააჩნიათ. ამგვარი ქცევა ეწინააღმდეგება მუსლიმის ზოგად გაგებას, რაც იმას გულისხმობს, რომ მუსლიმი სხვებისთვის სანდო ადამიანია. ისინი კეთილი, ტოლერანტი და განმანათლებელი მოხალისეები ჩანდნენ, მაგრამ მათი ნამდვილი სახე გამოჩნდა. ამ დაჯგუფებამ საკუთარ რიგებში მიღებულ წევრებს ჯერ ოჯახებთან გააწყვეტინა კავშირი, შემდეგ კი მათ რელიგიურ და ეროვნულ იდენტობასაც მისწვდა. ისლამისთვის აბსოლუტურად მიუღებელია ფარისეველი, ორმაგი სტანდარტის მიმდევარი, საკუთარ თავთან გაუცხოვებული და პიროვნულობა დაკარგული ადამიანის ტიპი. ისინი ცვლიან ადამიანის ბუნებას და რობოტებად აქცევენ. მათ ართმევენ თავისუფალ ნებას და მთლიანად ლიდერზე დამოკიდებულს ხდიან. ასეთ დროს ადამიანი თითქოს მოჯადოვებულია და ლიდერის ყველა მითითებას თუ ბრძანებას უყოყმანოდ ასრულებს. ამგვარი საგანმანათლებლო სისტემა არც რელიგიასთანაა კავშირში და მითუმეტეს არც ისლამთან.

 

ბატონო პრეზიდენტო,

პატივცემულო სტუმრებო,

ამ დაჯგუფების კიდევ ერთი დიდი ცოდვა ისაა, რომ დასავლეთში წამოგორებული ისლამოფობიური ტალღის პარალელურად რელიგიათა შორის დიალოგისა და ტოლერანტობის სახელით, ეშმაკზე სულმიყიდული მუსლიმის იმიჯი აირჩიეს და სხვებს ეუბნებოდნენ: „ჩვენშია ისეთი ისლამი, რომელიც თქვენთვის მისაღებია“.  

სხვა რელიგიებთან ისლამის ურთიერთობის ფორმები ყურანსა და სუნაშია მითითებული და ისლამის ისტორიის მანძილზე შესაბამისი პრაქტიკის მაგალითებიც მრავლადაა. წიგნის ხალხად მიღებულ რელიგიის წარმომადგენლებთან მშვიდობიან ურთიერთობაში ყოფნა, ისე რომ მათი რელიგიური გრძნობები არ იქნას შელახული, ისლამის ერთ-ერთი ძირითადი პრინციპია. ასევე შესაძლებელია მათთან ერთად კაცობრიობისთვის სასიკეთო საქმიანობის წარმართვა. თუმცა, სრულიად მიუღებელია რელიგიათა შორის დიალოგის სახელით საერთო თეოლოგიური ან რელიგიური კულტურის ჩამოყალიბების მცდელობა. რელიგიათა შორის დიალოგი აუცილებელია და ის შეიძლება გამოყენებული იქნას ზოგადსაკაცობრიო პრობლემების გადაწყვეტის მიზნით, მაგალითად შიმშილის, სტიქიური უბედურების და სხვა. დაჩაგრულ და გაჭირვებულ ადამიანზე დახმარების გაწევა შეიძლება ისე, რომ მისი რელიგიური კუთვნილება არც გავითვალისწინოთ. თუმცა, რელიგიათა შორის გარკვეული პოლიტიკური სტრუქტურის ჩამოყალიბების მცდელობა მიუღებელია. მითუმეტეს, სიტყვიერი შაჰადას დანაწევრება და შუამავალ მუჰამმედის შუამავლობის იგნორირების გზით სხვებთან ურთიერთობის დამყარების მცდელობა, კატეგორიულად მიუღებელია.

სარწმუნოების მხრიდან ამგვარი დამოკიდებულების გამართლება შეუძლებელია. მუსლიმობა ნიშნავს გჯეროდეს „ქელიმეი თევჰიდი“ სრულიად და არა მისი ერთი ნაწილი.

ბატონო პრეზიდენტო,

პატივცემულო ფორუმის წევრებო,

ყურანისა და სუნას სწავლება, ისლამის ძირითადი პრინციპებისა და მორალის, ადამიანებზე ახსნა, რა თქმა უნდა ისლამის გავრცელებისა და განმტკიცებისთვის მნიშნელოვანი საქმიანობაა. თუმცა ამ ყველაფრის ამქვეყნიური სარგებლის მიღების მიზნით გაკეთება, ამ მეთოდით ზეგავლენებისა და პოლიტიკური თუ ეკონომიკური ძლიერების მოპოვება, ყოვეგვარი შავბნელი საქმიანობის დასაშვებად წარმოჩენა, რა თქმა უნდა ისლამის უნივერსალურ პრინციპებთან შეუსაბამოა და შესაბამისად მიუღებელია. რელიგიის სახელით მატერიალური კეთილდღეობის შექმნა, ბუნებრივია ნამდვილ რელიგიურ საფუძველს მოკლებულია და ამგვარი დაჯგუფებებისა თუ გაერთიანებების წინააღმდეგ ბრძოლა ჩვენი მორალური და რელიგიური პასუხისმგებლობაა.

ისლამის გავრცელების მიზნით განხორციელებული საქმიანობისას ადამიანებს ღმერთის რწმენისა და შუამავლის გზისკენ უნდა მოვუწოდოთ და არა რომელიმე პიროვნების აღიარებისკენ. ყველაზე დიდი ბოროტებაა ღმერთის სახელით ადამიანებს სხვა ადამიანის მონობისკენ მოვუწოდებდეთ. დაუშვებელია ვინმეს თავისუფალი ნება, პიროვნულობა და გონება სხვა პიროვნებამ განაგოს. რელიგიის სახელით ადამიანების რელიგიური გრძნობების დაკნინება დაუშვებელია და ამგვარი საქმიანობის მიმდევარი დაჯგუფებები ისლამის საფუძველს ეწინააღმდეგებიან.

 

ბატონო პრეზიდენტო,

პატივცემულო ფორუმის წევრებო,

ისლამური საზოგადოება თავისი იდეური სკოლებით ერთი მთლიანობაა. ისლამი დაყოფის, დაჯგუფების, განცალაკევებისა და დანაწევრების გამოვლინებას ლეგიტიმაციას არ აძლევს. ისლამური საზოგადოება ერთმორწმუნოების პრინციპით ერთიანდება და ეს არ გულისხმობს ან დაჯგუფებების წარმოშობას, განცალკევებას ან განსხვავებულობას. განსხვავებულობა, ისლამურ საზოგადოებაში, ცოდნისა და აზრობრივ სიმდიდრეს გამოხატავს და არა განცალკევებასა და დაყოფას. ისლამური საზოგადოების რელიგიური კუთხით ნებისმიერი გაყოფის მცდელობა მიუღებელია. ასევე მიუღებელია რომელიმე დაჯგუფების მიერ სხვების უარყოფა და ამ პრინციპზე დაფუძნებული გაერთიანების შექმნა.

 

   ბატონო პრეზიდენტო,

პატივცემულო ფორუმის წევრებო,

წლების განმავლობაში ეს ორგანიზაცია არსებობს და ისინი თავიანთი საქმიანობის მეთოდებს ლეგიტიმურად მიიჩნევდნენ. ისინი აკნინებდნენ რელიგიას და რელიგიურ გრძნობებს. ისინი ადამიანების რელიგიურ გრძნობებზე ზემოქმედების გზით ხალხის ზექათს, მოწყალებას, სხვა მოსაკრებელსა და შვილებს იპარავდნენ. ისინი ჩვენი სარწმუნოების ძირითად პრინციპებს არღვევდნენ. ყოველგვარი ანტი-ისლამური მიდგომებითა და მეთოდებით ისლამურ საზოგადოებაში დაყოფასა და დაპირისპირებას იწვევდნენ. მათ შეძლეს შეეღწიათ სახელმწიფოს ყველა სტრუქტურასა და ყველა სფეროში და ქვეყნის მომავლის იპოთეკის ქვეშ აღებას ცდილობდნენ. ამ უკანასკნელი გადატრიალების მცდელობით „ფეთო“-ს ტერორისტული ორგანიზაცია დანაშაულის ადგილზევე იქნა აღმოჩენილი და მისი, როგორც რელიგიურ ორგანიზაცად განხილვა ყოვლად დაუშვებელია. ასევე შეუძლებელია ამ ორგანიზაციის ლიდერის რელიგიურ სწავლულად მიჩნევა.

ამ ორგანიზაციის იმამი საკუთარ თავს სამყაროს იმამს  უწოდებს. მის მიმართ განსჯას კი საფუძვლად შემდეგი აიათი უნდა დაედოს: „ერთი ადამიანის მოკვდინება, მთელი კაცობრიობის მოკვლას ნიშნავს“. იმ ღამით ხალხზე გალაშქრებით, მათი დაბომბვა და უდანაშაულო ადამიანების მოკვდინება არც ისლამთანაა კავშირში და არც ადამიანობასთან.

 

ბატონო პრეზიდენტო,

პატივცემულო ფორუმის წევრებო,

გამომდინარე აქედან, როგორც ჩვენი ქვეყნის მორწმუნე საზოგადოების, ისე რელიგიის სამმართველოს ვალდებულებაა ეს გამოცდილება გაითავისონ და სამომავლოდ პრევენციული ზომები გაატარონ. რელიგიის ბოროტად გამოყენების მსურველი ნებისმიერი ორგანიზაცია უნდა გამოვლინდეს და შესაბამისი ზომები გატარდეს. საჭიროა რელიგიური სწავლების გაძლიერება და ამ მიმართულებით საკანონმდებლო ნორმების შესაბამისობაში მოყვანა. ასევე მნიშვნელოვანია სამომავლო ნაბიჯების გათვლა და მომავალი თაობების აღზრდის საკითხში მეტი წინდახედულების გამოჩენა. რელიგიის სამინისტრომ უნდა უზრუნველყოს საზოგადოებისთვის ჯანსაღი რელიგიური სწავლების შეთავაზება. საჭიროა ყველა იმ მიმართულების გააქტიურება, რაც ისლამის უნივერსალური პრინციპების დაცვას და მათ სოციალურ ცხოვრებაში გატარებას შეუწყობს ხელს.

უნდა ვაღიაროთ, რომ თურქეთის სახელმწიფოს ყველა სფეროს ხელში ჩაგდების პრეტენზიის მქონე ორგანიზაციის წინააღმდეგ აქამდე არსებული რელიგიური და აკადემიური პასიურობა, რაიმე ახსნას არ ექვემდებარება. ამ მიმართულებით საჭიროა როგორც რელიგიის სამინისტროს, ისე თეოლოგიური ფაკულტეტების მუშაობის გადახედვა. ასევე სასწრაფო და მნიშვნელოვანია ამ ორგანიზაციის საქმიანობის სიღრმისეული შესწავლა.

 

ბატონო პრეზიდენტო,

პატივცემულო სტუმრებო,

ყველაზე მნიშვნელოვანი საკითხებიდან ერთ-ერთი არის ის, რომ ამ ტრაგიკული მოვლენის შემდეგ ჩვენი ქვეყნის ახალგაზრდობაში რელიგიური სწავლებისა და თუნდაც რელიგიური სამსახურისა და ქველმოქმედების მიმართულებით ერთგვარმა ნიჰილიზმმა არ მოიკიდოს ფეხი.

ამ მოღალატეობრივმა თავდასხმამ რელიგიური და სულიერი მდგომარეობის ერთგვარი დაბინძურება გამოიწვია და ახალგაზრდების სულიერ დეპრესიაში ჩაგდებაა მოსალოდნელი, რაც საკმაოდ ფაქიზ დამოკიდებულებას საჭიროებს. ახალგაზრდები დაბნეულნი არიან და არ იციან, როგორ ენდონ იმ ადამიანებს, რომლებიც რელიგიურ წინამძღოლობას უწევთ. ჩვენ ისინი უნდა დავიცვათ ამგვარი უიმედობისა და ნიჰილიზმისაგან. ჩვენ უნდა დავიცვათ ისლამის წმინდა პრინციპები, რომლებიც მშვიდობას, სამართლინობას, ძმობას და მაღალ ზნეობას ქაგადებს. ჩვენ უნდა ვიფიქროთ, როგორ შევძლებთ ჩვენი ახალგაზრდობის დაცვას მოსალოდნელი ნეგატიური ზემოქმედებისაგან.

 

ბატონო პრეზიდენტო,

პატივცემულო ფორუმის წევრებო,

შექმნილი სიტუაციიდან გამომდინარე ჩამოყალიბებული მაღალი ტემპერატურის პირობებში განხორციელებული რეაქციის შემდეგ, საჭიროა ცივი გონებით განსჯა. სამომავლო პროცესებმა ჩიხში რომ არ შეგვიყვანოს, საჭიროა გონივრული მიდგომა და ჯანსაღი დასკვნების გაკეთება. ჩვენი ერის ასეთი სიმამაცე და ერთად დგომა შესაბამისი სამართლიანი გადაწყვეტილებით უნდა დაგვირგვინდეს, რაც ისტორიაში სამართლიანად აისახება. როგორც სწავლულები შეგვახსენებენ ხოლმე, ამ პროცესების ყველაზე ეფექტური გაგრძელება არა შურისძიებით, არამედ სამართლიანობითაა შესაძლებელი. მე მჯერა, რომ ეს ფორუმი მოგვცემს ჩვენ მომავლის იმედსა და ყოველივე სასიკეთო გაგრძელების საწინდარი გახდება.

მე მინდა გამოვხატო ჩემი ღრმა რწმენა იმის თაობაზე, რომ ხვალინდელი დღე უფრო უკეთესი გვექნება. უსაზღვროდ მადლიერი ვარ ღმერთის, რომ ეს მიწა საუკუნებიის მანძილზე მუსლიმთა სამკვიდროა. ეს ხალხი შაჰიდების შთამომავლები არიან. ეს ეზნები და სელა ისლამის ხმაა. ამ სარწმუნოებას აქვს წმინდა წიგნი, რომლის ერთი ასოც კი არ შეცვლილა. ამ სარწმუნოებას ჰყავს შუამავალი, რომელიც ყველაზე საუკეთესო მაგალითის თვისებითაა შემკული. ღმერთმა გვიბოძა გული და გონება. ჩვენ გვაქვს უცვლელი ღირებულებები. ჩვენ 14 საუკუნის გამოცდილება გაგვაჩნია.

 

ბატონო პრეზიდენტო,

იმ საშინელ ღამეს, თქვენს მიერ გამოჩენილი ღირსებით აღსავსე ლიდერობის გამო, მთელი ჩვენი ხალხის სახელით, მინარეთებიდან ცრემლნარევი ხმით სელას მკითხველი მუეზინების სახელით, მთელი ისლამური საზოგადების სახელით,  მინდა უღრმესი და უდიდესიმადლობა გადაგიხადოთ. ამ საგანგებო ფორუმზე, აქ მყოფი დიდად პატივცემული სწავლულებისა და სხვა ძვირფასი სტუმრების სახელით მინდა გითხრათ, რომ გვჯერა, ამ საშინელი მოვლენის შემდეგ ჩვენი ქვეყნისთვის სასიკეთო მომავალი დაიბადება. ის კარი, რომელიც იმ ღამეს გაიღო და რომელიც უკუნი სიბნელისკენ მიდიოდა, სამუდამოდ დაიხურა. დიადი ღმერთი იყოს თქვენგან და ჩვენი ხალხისგან კმაყოფილი.  დარწმუნებული ბრძანდებოდეთ, ეს ერი, რომელსაც მთელი კაცობრიობის წინაშე თავს პასუხისმგებლობის მატარებლად მიიჩნევს, ამ ღალატის იარას სწრაფად მოიშუშებს.

ჩვენ გავაგრძელებთ ჩვენი სარწმუნოების, მისი სიწმინდეების დაცვას და იმ თაობების აღზრდას, რომლებიც ღმერთის გარდა არავის ჰმონებენ. ჩვენ, როგორც საზოგადოება, ერთიმეორის უფლებებს უფრო მეტად დავიცავთ და ერთიმეორის მიმართ უფრო შემწყნარებელნი ვიქნებით. ჩვენ ყველა იმ ღირებულებებს და შვილებს დავბრუნებთ, რომლებიც „ფეთო“-ს ორგანიზაციამ და სხვა მსგავსმა დაჯგუფებამ წაგვართვა. ჩვენ ერთი ადამიანიც კი არ გვყავს, რომელსაც ამგვარი ტერორისტული ორგანიზაციისთვის გავიმეტებთ.   ჩვენ, ისლამის უცვლელ გზაზე, სწორი მიმართულებით ვივლით. ჩვენ გზას გაგვინათებს ისლამი, რომელიც ყურანითა და სუნას მიხედვით ნათლადაა ჩამოყალიბებული. ჩვენ შორს ვიდგებით ყოვლგვარი ზღვარსგადასულობისა და გადაცდომებისაგან. ღმერთმა ჩვენ და მთელი კაცობრიობა ამ სწორი გზით ატაროს.

ჩემი გამოსვლის დასასრულს დიად ღმერთს ვთხოვ დაიფაროს ჩვენი ერი ყოველგვარი უბედურების, მძიმე გამოცდებისა, ამგვარი განსაცდელისაგან. ღმერთს ვთხოვ საშუალება არ მისცეს მათ, ვისაც სურს ჩვენი ერთობა და ერთიანობა დაშალოს. ღმერთმა დაიფაროს ჩვენი ქვეყანა, სარწმუნოება და ხალხი ყოველგვარი კონფლიქტისა და უბედურებისაგან და ჩვენი ეს შეკრება სიკეთის მომტანი ყოფილიყოს.

ყველას გულითადად მოგესალმებით. კეთილი იყოს თქვენი მობრძანება.    

  • 09/08/2016
  • 1327

კომენტარები

განაახლეთ

სტატიები

REZO AZİZ MİKELADZE

ჯემა’ეთი და მეჩეთი

REZO AZİZ MİKELADZE

მარხვა

REZO AZİZ MİKELADZE

სამოთხეში კვოტის დეფიციტი!

REZO AZİZ MİKELADZE

ხელმძღვანელობა

REZO AZİZ MİKELADZE

ქება-დიდება მხოლოდ უზენაეს ალლაჰს ეკუთვნის.

REZO AZİZ MİKELADZE

თეჰვიდი

REZO AZİZ MİKELADZE

რელიგიის როლი მსოფლიო მშვიდობისთვის

REZO AZİZ MİKELADZE

იმამი აზამი ებუ ჰანიფე და ღვთისგმობა

REZO AZİZ MİKELADZE

ზედმეტობა (იფრად), ნაკლოვანება (თეფრიდ), ზომიერება (იღთიდალ)

REZO AZİZ MİKELADZE

განგება და მისი აღსრულება


ქადაგებისქააბადან პირდაპირი ჩართვამედინადან პირდაპირი ჩართვა
:

ლოცვის დროს ბათუმში
ლოცვის დროს ბათუმში 30.03.2017
ცისკარი მზე ლანჩი დღის მეორე ნახევარში საღამო ღამ.ლოცვა